वीरगञ्ज —
पर्सा प्रहरीले ठूलो परिमाणमा लागूऔषध गाँजासहित एक भारतीय नागरिकलाई पक्राउ गरेको छ। विशेष सूचनाका आधारमा गरिएको सवारी जाँचका क्रममा १०२ किलोभन्दा बढी गाँजा बरामद भएपछि प्रहरीले चालकलाई नियन्त्रणमा लिई थप अनुसन्धान अघि बढाएको हो।
पक्राउ पर्नेमा भारतको बिहार राज्य, बेतिया जिल्ला, नवलपुर निवासी ३२ वर्षीय गुड्डु बर्मा रहेका छन्। उनी सवार रहेको बिआर ०१ सीयु ३५४४ नम्बरको सेतो रङको कारबाट ठूलो परिमाणमा गाँजा बरामद भएको प्रहरीले जनाएको छ।
जिल्ला प्रहरी कार्यालय पर्साका प्रवक्ता प्रहरी नायब उपरीक्षक राजु कार्कीका अनुसार आइतबार राति इलाका प्रहरी कार्यालय जानकी टोलाबाट खटिएको प्रहरी टोलीले जगरनाथपुर गाउँपालिका–२ स्थित इनर्वा जाने चोकमा भारततर्फ जाँदै गरेको उक्त कारलाई रोकी नियमित जाँच गरेको थियो।
जाँचका क्रममा कारभित्र विभिन्न स्थानमा लुकाएर राखिएको अवस्थामा १० वटा पोकामा प्याक गरिएको १०२ किलो ६ सय ३८ ग्राम गाँजा फेला परेको प्रहरीले जनाएको छ। बरामद गरिएको लागूऔषध नियन्त्रणमा लिएपछि चालक गुड्डु बर्मालाई तत्काल पक्राउ गरिएको हो।
प्रहरीका अनुसार बरामद गाँजा, प्रयोग गरिएको कार तथा पक्राउ परेका बर्मालाई नियन्त्रणमा राखी लागूऔषध सम्बन्धी कसुरमा थप अनुसन्धान भइरहेको छ। प्रारम्भिक अनुसन्धानमा उक्त गाँजा नेपालबाट भारततर्फ लैजान खोजिएको हुन सक्ने आशंका गरिएको भए पनि यसको वास्तविक स्रोत, गन्तव्य तथा संलग्न अन्य व्यक्तिहरूको पहिचान गर्न अनुसन्धान जारी रहेको प्रहरीले जनाएको छ।
खुला सीमाको दुरुपयोग गर्दै हुने लागूऔषध ओसारपसार नियन्त्रणका लागि सीमा क्षेत्रमा निगरानी तथा सवारी जाँचलाई थप कडाइ गरिएको प्रहरीले जनाएको छ। साथै, घटनामा संलग्न हुन सक्ने अन्य व्यक्ति वा सञ्जालको खोजीसमेत तीव्र बनाइएको प्रहरीको भनाइ छ।
