पर्सा । पटेर्वा सुगौली गाउँपालिका–३ सोनवर्षास्थित एक घरबाट प्रहरीले ८ देखि ९ बोरा प्रतिबन्धित गाँजा बरामद गरेको छ। सोमबार साँझ विशेष सूचनाका आधारमा छापा मारेर प्रहरीले घरधनीलाई नियन्त्रणमा लिएको हो।
प्रहरीका अनुसार मकवानपुरबाट भारतीय नम्बर प्लेटको बोलेरोमार्फत गाँजा ल्याएर सोनवर्षामा भण्डारण गर्ने गरिएको प्रारम्भिक अनुसन्धानबाट खुलेको छ। भण्डारण गरिएको गाँजा मेसिनबाट प्रेस गरी प्याकिङ गरेर भारततर्फ तस्करी गर्ने गरिएको आशंका गरिएको छ।
घटनामा अन्य व्यक्तिको समेत संलग्नता रहेको आशंकामा प्रहरीले अनुसन्धान तथा खोजी कार्य जारी राखेको जनाएको छ।
